گُــهرَ ڪئي گُـهرَ ڪندڙ عذاب واقع ٿيندڙ جي .

هڪ سوال ڪندڙ ڪافرن تي پوندڙ عذاب بابت سوال ڪيو،

هڪ گهرڻ واري عذاب گهري ورتو آهي جيڪو ضرور ايندو.

ڪافرن جي لاءِ ناهي ان جي لاءِ ڪو ٽاريندڙ .

جنهن کي ڪوبه هٽائڻ وارو نه آهي

(اهو عذاب) ڪافرن لاءِ ئي آهي. ان کي ٽارڻ وارو ڪير نه آهي.

الله بلندين جي مالڪ وٽان .

جو وڏن مرتبن واري الله جي طرفان (انهن تي ايندو).

جيڪو وڏن مرتبن واري الله تعالى جي طرف کان ايندو

چڙهندا ملائڪ ۽ روح ان ڏانهن ان ڏينهن ۾ جو هوندو ان جو مقدار پنجاهه هزار سال جو .

ملائڪ ۽ روح ان ڏي اهڙي ڏينهن ۾ چڙهندا جنهن جي ڊگهائي پنجاهه هزار ورهه ٿيندي.

ملائڪ ۽ جبرائيل ($) ان ڏانھن چڙهي ويندا آهن هڪ اهڙي ڏينهن ۾ جنھن جو مقدار پنجاهه هزار سال آهي.

پوءِ صبر ڪر صبر سهڻو .

پو ءِ(اي پيغمبر !) تون چڱو صبر ڪر.

(اي نبي ﷺ!)پوءِ تون سھڻي طريقي سان صبر ڪر.

بيشڪ اهي ڏسن ٿا ان کي پري .

بيشڪ اهي ان (ڏينهن) کي پري ڏسن ٿا.

هي ماڻهو (ان عذاب کي في الحال) پري ڏسن ٿا.

۽ اسين ڏسون ٿا ان کي ويجهو .

۽ اسين ان کي ويجهو ڏسون ٿا،

پر اسان ته ان کي (تمام) ويجهو ايندي ڏسون ٿا.

جنهن ڏينهن هوندو آسمان پگهريل ٽامي وانگر .

جنهن ڏينهن آسمان پگهريل ٽامي جهڙو ٿيندو،

جنھن ڏينھن آسمان پگهريل ٽامي جھڙو ٿي ويندو.

۽ هوندا جبل اُنَ وانگر .

۽ جبل رنگا رنگي پچيل ان جهڙا ٿيندا،

۽ جبل رنگ برنگي (پڃيل) اُن وانگر ٿي ويندا.

۽ نه پڇندو ڪو گهاٽو دوست ڪنهن گهاٽي دوست جو حال (احوال) .

۽ ڪوبه ويجهي ۾ ويجهو مائٽ ڪنهن به ويجهي ۾ ويجهي مائٽ کان پڇندو به نه

(ان ڏينھن) ڪير به گهرو دوست پنھنجي دوست کان پڇندو ئي نه.

ڏيکاريا ويندا انهن کي خواهش ڪندو مجرم ته بدلي ۾ ڏئي ان ڏينهن جي عذاب کان پنهنجا پٽ .

(توڙي جو) اهي انهن کي ڏسڻ ۾ ايندا. ڏوهاري خواهش ڪندو ته جيڪر ان ڏينهن جي عذاب جي بدران پنهنجا پٽ،

توڙي جو هو انهن کي ڏسڻ ۾ به ايندا، ان ڏينھن ڏوهاري ماڻهو چاهيندو ته جيڪر اڄوڪي ڏينھن پنھنجا پُٽ عذاب جي بدلي ۾ ڏئي ڇڏي.

۽ پنهنجي زال ۽ پنهنجو ڀاءُ .

۽ پنهنجي زال، ۽ پنهنجو ڀاءُ

پنھنجي گهر واري ۽ پنھنجو ڀاءُ (به ڏي).

۽ پنهنجو خاندان جيڪو پناهه ڏئي پيو ان کي .

۽ پنهنجو گهراڻو، جو هن کي پاڻ سان ملائي ٿو

پنهنجي ان خاندان کي به جنھن کيس پاڻ وٽ رهايو.

۽ جيڪي زمين ۾ آهن سمورا ان کان پوءِ ان کي ڇڏائن .

۽ جيڪي زمين ۾ سڀ آهن،سي بدلي ۾ ڏئي. وري (اهو بدلو ڏيڻ) ان کي ڇڏائي. ائين ڪڏهن به نه ٿيندو.

۽ زمين جي هر شيءِ فديي ۾ ڏئي هو پاڻ نجات حاصل ڪري.

هرگز نه! بيشڪ اها ڀڙڪندڙ آهي .

بيشڪ اها ڀڙڪندڙ باهه آهي

(پر) ايئن هرگز نٿو ٿي سگهي. اُها ڀڙڪندڙ باهه آهي.

ڇڪي لاهيندڙ کل کي .

جا کَل کي زور سان ڇڪي لاهيندڙ آهي.

جيڪا جسم جي چمڙي کي ڇڪي پٽڻ واري آهي.

سڏيندي ان کي جنهن پٺي ڏني ۽ منهن موڙيو .

ان کي (پاڻ ڏي) سڏيندي جنهن پٺ ڦيري ۽ منهن موڙيو

اها باهه (حق کان) پُٺي ڦيريندڙ ۽ منھن موڙيندڙ کي ته پاڻ ڏانھن (پري کان) سڏيندي.

۽ گڏ ڪيائين پوءِ سنڀالي رکيائين .

۽ (مال) گڏ ڪيو پوءِ سنڀالي رکيو.

ان مال جمع ڪيو ۽ (خرچ ڪرڻ بجاءِ ان کي) سنڀالي رکيو.

بيشڪ انسان پيدا ڪيو ويو حرص ڪندڙ .

بيشڪ انسان ڪمزور دل پيدا ڪيو ويو آهي

بيشڪ انسان کي (فطري طور) ڊڄڻي طبيعت وارو پيدا ڪيو ويو آهي.

جڏهن ان کي تڪليف پهچندي ته گهٻرائيندڙ .

جڏهن ان کي تڪليف پهچي ٿي ته بي صبر ٿيو پوي

جڏهن به مٿس ڪا مصيبت اچي پوندي آهي ته کڻي روڄ راڙو ڪرڻ شروع ڪندو آهي.